Radio Online-Tribunal Distrital Dili,Tersa (27/5)halao julgamentu poder partenal entre atuál Ministru Justica Deonisio Babo ho nia eis espoza, Luisa da Costa relasiona ho alimentasaun ba sira nia oan Melvin da Costa Babo Soares. Advogadu Paulo Remedios ne’ebe fó asistensia legal ba Luisa da Costa hatete, tribunal halo ona julgamentu hodi rona deklarasaun husi sasin parte nia kliente no sasin husi parte Denisio Babo.
Depois rona deklarasaun husi sasin sira, tama kedas ba alegasaun final. Tuir ajenda tribunal iha loron 30 de maiu 2014 sei halo leitura akordasaun. Paulo Remedios esplika liu tan katak nia kliente ezizi alimentus justu ho razaun kazu refere espesial, inklui Deonisio Babo hanesan atuál Ministeriu Justisa Timor-Leste nian.
“Alegasaun ne’e fo oportunidade ba ami parte ida-idak atu esplika nia kazu. Husi hau nia kliente Luisa halo pedidu ida ba tribunal atu aplika alimentus ne’ebe justu ba nia oan,”dehan Paulo Tan ne’e, responsabilidade osan ba nia oan labele hanesan ho trabailadór baibain, nune’e pedidu ne’e, nia kliente la ko’alia sobre kuantidade alimentus ida ne’ebe justu ba labarik.
Iha fatin hanesan Luisa da Costa hateten razaun nia husu kuantidade alimentus justu,tanba bazeia ba folin sasan iha Mercado ohin loron sa’e maka’as. Nia fó ezemplu susu ben ba labarik kalen ida hetan $25.00 e semana ida nia hemu kalen tolu(3)seidauk nia presiza buat seluk-seluk. “Lor-loron hau gasta e hau sura hotu ba fulan ida nia laran bele hetan to’o $800 to’o $ 1000 maibe ohin hau rona iha ne’eba hau rona dehan katak atu fo deit $350 to’o 400 ne’e hau la simu,s e nia fo hanesan ne’e nusa la para tia deit e. Lalika hare labarik, nia asumi kargu hanesan Ministru ida nusa maka labele fo alimentus ba nia oan liu husi ida ne’e”Luisa esplika ho hirus.
Luisa esplika liu tan katak Durante ne’e Ministeriu Justisa Deonisio Babo nunka tau matan ba nia oan. Nia rasik haruka mensajen liu-husi telemovel mais nunka responde, mesmu iha rezultadu DNA hatudu momos katak nia maka Melvin ninia aman biolojika [biological father]. Entertantu, Defensor Fernando de Carvalho ne’ebe fó asistensia legal ba atuál Ministeriu Justisa Deonisio Babo la autoriza atu jornalista sira bele hakerek no públika deklarasaun sasin sira nian iha audensia julgamentu nia laran.
Audensia ne’e prezidi husi Juis Koletivu, Julio Gantes, Jose Maria de Araujo,Julmira Auxiliadora, Ministeriu Publiku reprezenta husi prokuradór Ivonia Guteres,no advogadu Paulo Remedius fó asistensia legal ba Luisa no Ministru Babo la marka prejensa maibe reprezenta deit husi Defensór Fernando de Carvalho. Luisa ho Dionsio Babo ninia kazu tama iha tribunal iha tinan 2012 hafoin deskonfia akontese violensia domestika iha Edefisiu Ministeriu Justisa iha 5 Setembru 2012 ne’ebé involve Dionsio Babo rasik. Iha momentu ne’ebá Luisa tama kedas iha sala emerjensia Óspital Guido Valadares (HNGV).
Bainhira prosesu justisa ne’e lao, Dionisio Babo rasik nega katak Melvin laos ninia oan, nune’e parte tribunal foti desizaun hodi haruka halo teste DNA iha instituisaun independente. Ikus mai prosesu DNA ne’ebé halo iha rai India ninia rezultadu hatudu katak Dionsio Babo duni maka labarik Melvin nia aman biolojiku iha lian Inglés dehan ”biological father ”
.JPG)
