IV Governu Konstitusional Intrega Save Igreja Foun Ave Maria Suai Ba Diosese Maliana

SUAI-Primeiru Ministru Kay Rala Xanana Gusmao Tersa Feira (26/06) ne’e intrega ona Xave igreja Ave Maria foun ba Dioseze Maliana, igreja Ave Maria Suai ne’ebe hahu halo kontiniusaun ba konstrusaun hosi kompania Bakthi Karya Timor (BTK).

            “Ita hotu  orgulho tanba fo valor ba sakrifisiu ne’ebe sarani Suai hahu antes de 1999, iha 1999 ema barak mak mate inklui Padre nain 3 ho sarani lubuk ida maka mate iha igreja Ave Maria Suai” dehan Xanana iha nia deskursu.

            Xanana  haktuir katak buat sira hanesan ne’e ita presija servisu hamotuk , tanba igreja partisipa maka’as tebes durante  funu ba ita nia libertasaun hodi partisipa mos atu harii sidadania foun iha ita nasaun Timmor-Leste.

            Nune’e ita Timor oan fo valor sakrifisiu ba ita nia inan aman sira no bele hadi’a ita nia nasaun.

            Xanana husu bo’ot katak iha futuru governu sedeit tenke kompriende papel igreja nian iha sosiedade Timor Leste, no mos papel igreja ba konstrusaun sidadania.

            Kay Rala husu mos ba governu foun nebe sei kaer ukun atu bele halo kontrola nafatin ba igreja foun iha liur ka iha laran, tanba ho ida ne’e ita timor bele hamotuk hadi’a nasaun doben ida ne’e.

            Kay Rala husu ba sarani Covalima katak ida ne’e hanesan ita nia riku soin ida, ne’ebe labele estraga, maibe tenke kuidadu halo didiak.

            Xanana mos husu ba lider local sira, hahu hosi Xefe Aldea to’o Administrador Distritu, inklui polisia tenke kontribui hodi tau matan para labrik sira labele tama mai iha jardin sira ne’e hodi estraga fali ai funan sira ne’e iha igreja oin.

            Iha fatin hanesan Amo Vigario Jeral hato’o lia fuan Bemvindo hosi Dioseze Maliana Lucio Norberto De Deus ba governu ne’ebe lidera hosi Kay Rala Xanana Gusmão.

            Amo Vigario haktuir katak ho ita nia uma kreda, liliu ba sarani Suai ita hare iha uma harohan ida ne’ebe furak ba ita nia rain Timor-Leste.

            Uma kreda ida ne’e uniku iha Decade ita ukun an nian, ne’ebe ita hotu agradese, ita haksolok ba buat ne’ebe mosu iha ita nia let.

            Dioseze Maliana, Dioseze ida ne’ebe foun, ne’ebe bele hatete katak la’o ho infrastrutura ida ne’ebe minimu tebes, iha tinan rua nia laran.

Dioseze Maliana konsege hari iha ninia infrastrutura lubuk ida, hanesan iha 15 kapelas  ne’e halo rehablitasaun, iha igreja paroquial 3, ho ida ne’ebe bo’ot liu maka Igreja Ave Maria Suai ne’e.

Aleide ne’e mos iha Aktividades formasoens, Aktividades sosiais ne’ebe hetan hotu apoiu hosi fundus sosiedade sivil nian.

Aktividades no konstrusaun sira hotu halo Diosese Maliana foun la’o dadaun ho ninia vizaun no misaun ida, liu hosi oportunidade ida ne’e Diosese Maliana ho sarani tomak liliu iha Distritu Covalima fo agradese tebes ba Primeiru Ministru Xanana Gusmao.

Iha Okaziaun ne’e mos Diosese orguilho katak buat sira hanesan sei la’o nafatin iha tempu oin mai, ba kompania BTK  sira nia kreatividade, ho sira nia servisu hamortuk, ho governu liu hosi asesor PM nian fo agradese tebes ba ita bo’ot sira nia kreatividade servisu di’ak ba igreja ida ne’e.

Amo vigario hatutan katak ita ema hetan sentidu vida nian iha ita nia servisu ne’ebe diak, kuandu ita halo buat ne’ebe di’ak sente katak ita nia vida ne’e vale.

Hodi moskomisaun da projetu Diosese Maliana nia lian haktuir katak fo agradese no husu deskupa durante sei iha servisu lao ne’ebe ita buat ruma ne’ebe ladun diak, tanba ita hotu hakarak ne’e nia rezultadu sai diak.

Ne’ebe buat sira ne’e hotu kuandu ita servisu hamotuk , sempre iha difrensia ideas, depois ita buka solusaun hodi resolve maka buat hotu ohin loron lao diak.

Amo Vigario hodi Amo Bispu nia lia fuan hato’o ba governu katak iha 15 de Agustu mai ne’e ita hotu mai halibur iha igreja foun ne’e hodi fo bensa, katak ita mai ho ita nia status agora iha fulan Agustu  oin mai ne’e.

Nune’e mos Padre Parokia Ave Maria Suai Jose Maya hato’o mos lia fuan bemvindu ba PM Xanana ho nia komitiva tomak to’o iha igreja Ave Maria foun hosi entrega xave ba Diosese Maliana.

Iha fatin hanesan Padre Jose Maya nudar amo paroquai Igreja Suai hatenten,  igreja ida ne’e la’os naran hanesan parokia Ave Maria Suai, maibe naran lolos ne’e maka Igreja Ave Maria Suai, inklui mos Distritu Covalima, katak uluk iha kova lima deit maibe oras ne’e sai ona ba kova hitu, tanba kova foun ida maka sub-Distritu Maucatar, kovalima ne’e mak sai kova ida deit, Igreja Ave Maria Suai maka halo Kova Lima sai Kova ida deit.